كيف أتخلص من البرص فى المنزل

عموما كمعلومة قد تفيدك الفتحات حول التكييف في الحائط  ،و الشبابيك المفتوحة  ، هي من أهم مداخل البرص للبيت ، فيجب أن تتأكدي من تقفيل هذة الفتحات، ووضع السلك علي الشبابيك خصوصا المطبخ و الحمام  ، أو المواجهه للحدائق أذا كانتي معرضه لدخول البرص.

• بيقال ضعي بيض في المكان ، لأن البرص بيعتبرة بيض أفعي فيخاف و يهرب ( جربت هذه الطريقة   و لم تفلح )
• تبخير البيت بالمستكه طارد للبرص لأنه يكرة رائحتها.
• مسح حواف الشبابيك و الفتحات بزيت السيارات.

أخر طريقتين لم أجربهم

بالنسبة للطرق المجربة و فعلا جابت نتيجة

• لو في برص فعلا بالمكان  ،و عندك الجرأه انك تقتليه أو زوجك معاكي و يقدر يقوم بالمهمة ، بالنيابة عنك رشي مبيد حشرات في مكانة .. اللي حيحصل أنه حيدوخ ، و مش حيسيطر علي حركتة ، ساعتها سهل قتلة بعصا أو شبشب.
• الطريقة التانية : شبيهه بقتل الفئران .. أحضري لاصق فئران علي كرتونه ، و أفرشيه عليها و كرري علي كذا كرتونه  ، بمعني يكون عندك قطعتين تلاتة ووزعيهم في كذا مكان في الغرفة اللي مختفي فيها و أقفلي الباب  ، فرصة قوية جدا أنك تمسكيهم بالطريقة دي  ، و كرري الحكاية دي علي كذا يوم ، لحد ما يتمسك ، بس طبعا خللي بالك في وجود الأطفال ، علشان ما يقفوش علي الورق و يأذيهم، المهم توزعي الورق حول المكان اللي مستخبي فيه.

بالنسبه للوقاية :

• سد الفتحات زي ما قلنا كلها ، كمان نسيت أقولك لو عتب الباب عالي عن الأرض ممكن تسدي الفرق بأي مشاية صغيرة ، لأن السلم  من الأماكن اللي بيتواجد فيها.
• عند العطار نبات أسمة شيح .. النبات دة طارد للثعابين و الزواحف ، تقدري تشترية و تجيبي صرر صغيرة أو أكياس من التل  ، من محلات مستلزمات السبوع ، ووزعي فيه الشيح ووزعيه  عند الشبابيك و البلكونات ، و أي مكان ممكن يدخل منه ، و كل شهر غيري الصرر بأخري جديدة.